Іспанскі фотажурналіст аднавіў тэхніку, знішчаную расійскім дронам

Іспанскі фотажурналіст Дыега Эрэра падзякаваў у сацсетцы X усім, хто дапамог сабраць грошы на новае прафесійнае абсталяванне пасля расійскай атакі на ягоны аўтамабіль у Славянску. Фатограф вярнуўся да працы ва Украіне і працягвае дакументаваць наступствы расійскіх удараў па Данеччыне.

Знічшаная тэхніка іспанскага фотажурналіста Дыега Эрэра. 24 верасня 2026 года. Фота: Дыега Эрэра з сацсеткі Х

У акаўнце ў X Дыега Эрэра з’явіліся новыя здымкі са Славянска і Краматорска. На фотаздымках — параненыя мірныя жыхары пасля расійскіх удараў і пашкоджаныя будынкі.

Як паведамляла іспанскае выданне El Español, напад адбыўся 24 верасня ў Славянску Данецкай вобласці. Эрэра ехаў у аўтамабілі разам са шведскім калегам Мустафам Джанам, калі пачуў, як украінскія вайскоўцы спрабуюць збіць расійскі FPV-дрон. Журналісты спынілі машыну і схаваліся ў супермаркеце.

Неўзабаве беспілотнік урэзаўся ў іх аўтамабіль, які не меў маркіроўкі прэсы. Абодва журналісты не пацярпелі. Аднак машына і фотатэхніка Эрэры згарэлі. Агонь таксама знішчыў ягоны працоўны ноўтбук і сродкі абароны.

Mi coche civ­il y mis cámaras han sido destru­idas por un drone FPV ruso. Si alguien quiere ayu­darme a com­prar un equipo fotográ­fi­co nue­vo os dejo mi Bizum 656565399 y mi pay­pal https://t.co/uq6NoDSKIV https://t.co/CSGgYDXgAa

— Diego Her­rera Pho­to­jour­nal­ist (@dherreraphoto) Sep­tem­ber 24, 2026

Пасля атакі фатограф звярнуўся да падпісчыкаў па фінансавую дапамогу, каб набыць новае абсталяванне і працягнуць працу ва Украіне. Эрэра працуе як незалежны журналіст і публікуе свае матэрыялы, у прыватнасці, ў турэцкім інфармацыйным агенцтве Anadolu.

На напад адрэагаваў Нацыянальны саюз журналістаў Украіны.  Грамадская арганізацыя «Інстытут масавай інфармацыі» таксама абвінаваціла Расію ў сістэматычных злачынствах супраць журналістаў і сродкаў масавай інфармацыі. Паводле звестак арганізацыі, пра якія паведаміла El Español, за чатыры гады і сем месяцаў расійскага ўварвання ва Украіну было зафіксавана 977 такіх выпадкаў.

I would like to express my enor­mous grat­i­tude to every­one who has donat­ed, to @RSF_inter and the NVF Fund for their finan­cial sup­port, which has enabled me to recov­er my equip­ment and get a car, and to April, for giv­ing me a new bul­let­proof vest and hel­met. https://t.co/MC6KcbggJp

— Diego Her­rera Pho­to­jour­nal­ist (@dherreraphoto) Octo­ber 16, 2026

У 2024 годзе Дыега Эрэра атрымаў Міжнародную прэмію караля Іспаніі ў галіне журналістыкі ў намінацыі «Фатаграфія». Узнагароду яму прынёс фотарэпартаж для часопіса 5W пра смерць і жыццё ў нястачы ва ўмовах вайны, распачатай расійскім уварваннем ва Украіну.